THU ZIAH

“Thu ziah hi thil namai a lo ni lo”

Ziak thranglo tih takah he thu ziak tur pawh hian a Thupui turah ka buai nghal phawt a. Enge a thupuiah ka vuah ang tih ka ngaihtuah chhungin “Hengte hi ziak ila, heti zawng hian ziak ta ila a chhiar a nuam deuh ang” tia ruahmanna ka lo neih sa zawng zawngte kha an lo bo zo duak a. A thupui tur thra leh zahpuiawmlo ve deuh nia ka hriat ka hual meuh chuan a chhung thu tur kha ka lo nei leh tawh reng reng lo mai a. Vanduaithlak takin a thupui tur ka thlanchhuah ve meuh mil pawh chuan thu han phuahkhawm chu ka harsat nasa ta mai a, a thupui mil reng reng chuan ka ziak thei ta lo e.

KUHVA :
A landan atrang ringot chuan “Thu ziah” hi chu har vakloh hmel tak hi a ni ngei a, mahse awmze nei leh ngaihnawm tling tur khawp chuan beih fe a ngai, ziak tura pianpui thilthlawnpek nei reng renglo keini ang lungleng mi ve satliah tan chuan Article pakhat ziah pawh hi a sual a sual fe a ngai chiang khawp mai. Thu ziak tur chuan kan han thru hrang ve nguk a, mahse Pen han hum chiah ila mitthla ah kuhva a rawn lang hmasa bera, kuhva ei chhungin Pen kan hum hma a rilru a kan lo vei leh rilru kap tu ve deuh zawng zawng pawh kha kan lo thial sawm tel nuaih tawh a, Kuhva kan thrial sawm a, lem a lo hun meuh chuan an lo bo leh duak hman thrin!! Kuhva hi Pumpui tan chauh hian thil thralo a lo ni lova, keini ang, rilrua vei nei ve si, ziak ngeia dahthrat tum ve tlat te tan pawh “Hnimhlum” a lo ni e!!!!

Rilru Thinghlimlo:
Hmai sen trawn trawn khawpin rilru sawrbingin, theihpatawpa ziah thrat tumin kan han inti lungleng chawp vel a. Pathian thilsiam mawizia leh ropui zia te, siamtu zah leh trih hmel ngawih ngawih maia an tual chai, keini mihringte anga phunchiar lo leh tumah awt lova an tualchai vel te chu thu hmanga mawi taka mi rilru ah a tla na thei ang ber turin ziah tumin tukverh ah kan han dak chhuak ve lurh lurh a. Thu ril leh rilru chhun ngaih mai, kan tu leh fate thleng pawha ‘Ka Pu kha chuan a lo hmu chiang asin” an tih paha intithei taka an hawi pir vah na tur phuah chhuah tum ve thrin nak alai hian. Rallehlam mihausa pa in a eiruk atrang ngei maia in lianpui a sak han hmuh meuh chuan mahni pawh engmah ni hleilo hian itsik leh awt rilru tak chung hian “An chhungkua an hlim chuang lovang” hi kan han ti ve ngawt thrin a. An dinhmunah ding ila an aia nasa in kan eiru in mirethei kan hnuaichhiah zawk daih angem? tih inngaihtuah chiang hmasa miah lova Threnawmpa eiruk nasat dan tur rilru a lo chhut pui vak hnu ah chuan Thu leh Hla ngaihnawm leh ril tak mai, thinlung chhungril ber thleng pawha thu sawi thei khawp tur remkhawm chu har tak a ni. Rilru thianghlimlo tan chuan ‘Thu Hnutchhiah tlak’ ziah chu a har a ni e.

Zan Reh:
“Chhungte men ve lai chuan min lo be buai ve sek a ngaihtuah bing a har”, han ti in chhungte mut reh hun kan han nghak ngei a, Film pahnih pathum te han en zawh chuan chhungte pawh an lo mu ta threp thrawp a. Mite tih itsik niawm tak hian “Khawnge, awmze nei tak, kawhhmuh thra tak nei kan ziak ve reng reng teh ang’ ti rilru chungin thruthmun chu kan han rem ve ta ngei a. A reh thra thrap thrap tawh bawka, rilru pawh tlem chuan a kal ding ve deuh, hlawm hnih vel kan han ziak ta maw tih ah, rilru a kal bing ve lai tak maiin khang muhil tawh te zinga a tu emaw ber khan thawm a rawn nei tran a, a thawk a rawn danglam tran a, a thawk luh zawnga ri awm miah lo khan a thawk chhuah zawng chuan muang fan raih mai hian ‘fik…..fik……fik…..’ a rawn ti ta, a hnar chu a ni silo!!!!! Rilruin tunge tih a zawng nghal thuai thuai a, mahni chil lem ri pawh a rin tawh vei nen. Zan reh eng ang mahse min tibuaitu a te ting mai a nih hi, ziak tura Pianpui thilthlawnpek nei ve reng renglo keini ang tan chuan Thu Ziah hi namai a ni lo e.
“Khai aw……. hetiang chuan kei ve tehlul hian ziak turin hun remchang eng tikah mah ka hmu ngai dawn lo tlat” tiin thinrim rilru treuh chungin tuna i chhiar thlak nuap nuap ho kha ka thai khawm ve ta buan buan a ni. Kawhhmuh tum pawh va nei suh!!!!