Kum 1966 aţanga Mizoramin buaina nasa tak kan tawh tak avang khan 1966-68 velah khan thingtlang lam chuan khaw khawm te, khaw hal te an tuar nasa hle a. India sipaiin min awp bet a, Curfew pawh a khat tawkin an puang reng a ni. Thlawhhma leh ei leh bar zawn kawngah harsatna a lo zual deuh deuh a, Mizoram chu ţamna namen lovin a tlak buak ta a. Mahni khaw bu luah thei an awm tak loh avangin Aizawl lamah nun bul ţan thar leh turin an pem ta ruih ruih hlawm a.
Hmun remchang lai laiah chuan awmhmun an sual ta a. Chuti ang chu a lo nih takah chuan sawrkar hotute leh Pu C. Pahlira te remruatna-in hmun awl remchang lai laiah Refugee Colony din a lo ni ta fur a. Tuna Ramhlun Vengthar lo ni ta pawh hi chuti anga an lo siam chu a ni a; temporary pass area, feet 30x30 bial lek lekah an lo inbawk ve thliah thliah a ni. Bawng in tiat lek lek, a chhuat leiah hmangin di in-ah 1969 kum bul aţangin an lo awm ţan ve ta hlawm a ni.
Kan vengah hian balhla a ţha duh hle mai a, balhla kung pawh a tam ang reng a; ralkhat aţanga thlir phei chuan changel kara sanghal bu chheh ni awm lek lek hian inte chu a bawk sen ve fir fer hlawm mai an ti!
Thingtlang hmun hrang hrang aţanga pem khawm an nih hlawm avang chuan mahni ţhenawmte pawh an inhre mumal hlawm lo va. Khawkhat chhuakho tih loh chu hminga inko thei pawh an awm mang si lo va, mahni hma zawn zawnah mahni mum mumin an mum a ni ber awm e.
A tira khawsaho chu: East Phaileng, Lailak, North Chaltlang, Khawruhlian, Vanbawng, Suangpuilawn, Zawngin, Luangpawn, Changzawl, Buhban, Lungpher, Khawkawi, Saichal, Sihfa, Saitual, Ruallung, Maite, North Khawdungsei, Sairum, Sehlawh leh Parvatui te an ni hlawm a (hmaih a awm mai thei). Refugee Colony-a awm kan nih avang chuan Refugee Veng ti-a koh kan ni ta a ni.
Kum 1969 favang lai vel khan ram pum huapin Refugee Association din a ni a.Circle hrang hranga siam niin kan Circle-ah chuan: Ramhlun, Bawngkawn, Chaltlang leh Zemabawk te kan awm a. Kan veng mi, Pu C. Lalchhandama (L) pawh Circle Officer-ah ruat a ni. Sawrkar hnena Refugee Association hminga ţanpuina dil a nih chuan Sawrkar hotute chuan ni theiin an hre lo va- “Mahni ram chhungah Refugee kan awm tur a ni lo vang, a hming pawh hi thlak ta u la a ţha awm mang e,” an ti a. Tichuan, a hming thar atan Distress Association tih chu vuah a lo ni ta a. Refugee Veng tih pawh dik lovin an hre ta zel a ni ang, keini veng pawh RAMHLUN VENGTHAR ti-a thlak a lo ni ta a. Ramhlun Vengthar tiin sawrkar lam leh Village Council-ah te ziah zel a ni ta a; mahse, Refugee Veng tiin rei tak chu koh chhunzawm kan la ni ta tho tho a ni.
(He thu hi Pu C. Lalchhandama auto-biography, Ramhlun Vengthar Branch YMA Silver Jubilee (1971-1996) Souvenir, 'Ramhlun Vengthar Hi' tih aţanga lak a ni a; a thu hi chhiar a nawm zawk nana siam rem deuh a ni.)
- Albert Vanlalruata
0 comments: